ဟမ်းစတားလေး ကျန်းမာဖို့ ဘာတွေကျွေးရမလဲ?

အကောင်သေးသေးနဲ့ ချစ်ဖို့ကောင်းပြီး မွေးရလွယ်ကူတဲ့ ဟမ်းစတားတွေဟာ တိချစ်သူတွေ အမွေးများဆုံးထဲက တစ်ခုဖြစ်တဲ့ တိလေးတွေပါ။ သူတို့ သက်တမ်းတစ်လျှောက် ကျန်းကျန်းမာမာနဲ့ သက်တမ်းစေ့နေနိုင်ဖို့ သင့်တင့်မျှတပြီး အာဟာရပြည့်ဝတဲ့ အစားသောက်မျိုး လိုအပ်ပါတယ်နော်။ ဒါ့ကြောင့် ဟမ်းစတားတွေ စားလို့ရတဲ့ အစားအစာနဲ့ မရတာတွေကို တိချစ်သူတွေအတွက် တစ်ခုချင်းဖော်ပြပေးချင်ပါတယ်။

1. အခြေခံ လိုအပ်တဲ့ အစာ

• အစာခြောက်နဲ့ အစေ့တွေဟာ သူတို့ အဓိကစားတဲ့ အစာဖြစ်သင့်ပါတယ်။ ဟမ်းစတားတွေအတွက် သီးသန့်ထုတ်ထားတဲ့ အစာခြောက်ဟာ သူတို့အတွက် လိုအပ်တဲ့ အာဟာရတွေ ပါဝင်အောင် ထုတ်လုပ်ထားတာမို့ အဲ့လိုအမျိုးအစားကို ရွေးဝယ်စေချင်ပါတယ်။ 
• အစာခြောက်နဲ့ အစေ့အစာကို တစ်နေ့ စားပွဲတင်ဇွန်း (၁) ဇွန်းကနေ (၂)ဇွန်းအထိ ကျွေးစေချင်ပါတယ်။ ဒါပေမယ့် ဟမ်းစတားရဲ့ အရွယ်အစားနဲ့ လှုပ်ရှားမှု အပေါ်မှာ မူတည်ပြီး ပမာဏ ကွာခြားနိုင်ပါတယ်။

2. လတ်ဆတ်တဲ့ အသီးအရွက်

ဟမ်းစတားတွေအတွက် သင့်တင့်မျှတတဲ့ အာဟာရ ရရှိဖို့ လတ်ဆတ်တဲ့ အသီးအရွက်တွေ ကျွေးပေးလို့ရပါတယ်။ ဟမ်းစတားတွေ စားလို့ရတဲ့ အသီးအရွက်တချို့ကတော့

• မုန်လာဥ
• ပန်းပွင့်စိမ်း
• သခွါးသီး
• ဒေါက်ခွ၊ မုန်ညင်း နဲ့ ကိုက်လန် (အရွက်စိမ်းတွေဆိုရင် အနည်းငယ်သာ ကျွေးပေးပါ)
• ငရုတ်ပွ တို့ဖြစ်ပါတယ်။

အသီးအရွက်တွေ စစကျွေးစမှာ အစာအိမ်ပြဿနာတွေကနေ ကာကွယ်ဖို့ ပမာဏအနည်းငယ်သာ အရင်ကျွေးပြီး ဖြည်းဖြည်းချင်း တိုးသွားနိုင်ပါတယ်။

ဟမ်းစတားတွေက အသီးစားရတာကြိုက်ကြပေမယ့် သကြားပါဝင်မှု များတာကြောင့် လျှော့လျှော့ပေါ့ပေါ့သာ ကျွေးပေးသင့်ပါတယ်။

• ပန်းသီး (အစေ့မပါ)
• ဘလူးဘယ်ရီ (အစေ့မပါ)
• ငှက်ပျောသီး စတာတွေ ကျွေးပေးနိုင်ပါတယ်။ တစ်ခု သတိထားစေချင်တာကတော့ သူတို့ကျန်းမာရေးအတွက် အသီးတွေကို တစ်ပတ်ကို တစ်ခါကနေ နှစ်ခါကနေအထိသာ ကျွေးစေချင်ပါတယ်။

3. ပရိုတင်းဓာတ်ပါတဲ့ အစားအစာ

ဟမ်းစတားတွေက အစုံစားတဲ့ တိတွေဖြစ်တာကြောင့် ကျန်းမာဖို့ ပရိုတင်းဓာတ်လည်း လိုအပ်ပါတယ်။ ဟမ်းစတားတွေ စားလို့ရတဲ့ ပရိုတင်းအစာတချို့ကတော့

• ကြက်ဥပြုတ်
• ပိုးကောင် (mealworm)
• ချက်ပြုတ်ထားတဲ့ ကြက်သား (အရသာမပါ) တို့ဖြစ်ပါတယ်။

4. အစေ့အဆံ

အရသာလည်းရှိပြီး အာဟာရပြည့်ဝတာမို့  အစေ့အဆံတွေဟာ ဟမ်းစတားတွေ အကြိုက်ပါ။

•  နေကြာစေ့ (အဆီပါဝင်မှုများတာကြောင့် သွားရည်စာ အနေနဲ့သာကျွေးသင့်ပါတယ်)
• ဖရုံစေ့ (တစ်ရက်ကို တစ်ခုကနေ နှစ်ခုအထိ ကျွေးပေးနိုင်ပါတယ်)
• မက်မွန်စေ့ (ခါးတဲ့ မက်မွန်စေ့ မဖြစ်ရပါ။ အနည်းငယ်သာ ကျွေးပေးပါ)

5. ဂျုံ၊ စပါး

ဂျုံ၊စပါး စတဲ့ အစေ့အဆံတွေဟာလည်း ဟမ်းစတားတွေအတွက် အာဟာရပြည့်ဝဖို့ အကူအညီပေးပါတယ်။

• အုတ်ဂျုံ
• ဆန်လုံးညို
• ပေါင်မုန့်နဲ့ ဘီစကွပ်အကြွပ် စတာတွေ ကျွေးပေးနိုင်ပါတယ်။

ရှောင်ရှားသင့်တဲ့ အစာတွေ

တချို့အစားအစာတွေက ဟမ်းစတားတွေအတွက် အန္တရာယ်ဖြစ်စေပြီး အဆိပ်ပါဖြစ်စေနိုင်တဲ့အတွက် လုံးဝမကျွေးသင့်ပါဘူး။ 

• လိမ္မော်သီး၊ သံပုရာ၊ သံပုရိုသီး စတာတွေက ဟမ်းစတားတွေအတွက် အက်ဆစ်ဓာတ် အလွန်များပါတယ်။
• ကြက်သွန်နီ၊ ကြက်သွန်ဖြူတွေ စားမိရင် အစာအိမ်ပြဿနာတွေနဲ့အတူ အဆိပ်တောင် ဖြစ်နိုင်ပါတယ်။
• ဟမ်းစတားတွေလည်း ခွေး၊ကြောင်၊ ယုန်တွေလိုပဲ ချောကလက်နဲ့ မတည့်ပါဘူး။
• အာလူးအစိမ်းစားမိရင်လည်း အဆိပ်ဖြစ်တတ်ပါတယ်။
• ပြုပြင်ထားတဲ့ အစားအစာတွေ၊ သကြားပါပြီး အချိုကဲတဲ့ အစာမျိုးတွေက အဝလွန်ခြင်းနဲ့ အခြားကျန်းမာရေးပြဿနာတွေ ဖြစ်စေနိုင်တာကြောင့် မကျွေးသင့်ပါဘူး။

ကဲ … ဒါဆိုရင် ဟမ်းစတားတွေအတွက် ကျွေးသင့်တဲ့အစာ အာဟာရတွေနဲ့ ဆောင်ရန်ရှောင်ရန်တွေကို သိသွားကြပြီလို့ထင်ပါတယ်။ ဟမ်းစတားတွေဟာ သွက်လက်ပြီး ဆော့ကစားရတာကြိုက်တဲ့အတွက် ရေကို အလုံအလောက်တိုက်ဖို့လည်း မမေ့စေချင်ပါဘူး။ သင့်တင့်မျှတပြီး သန့်ရှင်းမှုရှိတဲ့ အစာနဲ့ ဂရုစိုက်မှုတွေရှိရင် ဟမ်းစတားတွေလည်း သက်တမ်းစေ့ ကျန်းကျန်းမာမာနေနိုင်တာကြောင့် ဒီအချက်လေးတွေနဲ့ အစာကို ဂရုတစိုက် ကျွေးပေးဖို့ တိုက်တွန်းလိုက်ပါတယ်နော်။