ငှက်တွေအတွက် အန္တရာယ်ဖြစ်စေနိုင်တဲ့ အစာ (၁၀) မျိုး

ငှက်လေးတွေက နူးညံ့ပြီး သေချာထိန်းသိမ်းရတဲ့ အိမ်မွေးတိလေးတွေပါ။ သူတို့ကိုမွေးဖို့ဆိုရင် ဘာတွေလုပ်သင့်/ မလုပ်သင့်၊ ဘာတွေ ကျွေးသင့်/ မကျွေးသင့် စတာတွေ သေချာသိထားဖို့လိုပါတယ်။ လူတွေစားလို့ရပေမယ့် ငှက်တွေအတွက် အန္တရာယ်ဖြစ်စေနိုင်တဲ့ အစာတွေရှိတာမို့ ဘာတွေ ရှောင်ရှားရမလဲ ဆိုတာ တိချစ်သူတွေအတွက် ဖော်ပြပေးလိုက်ပါတယ်။

1. ထောပတ်သီး - အသီးဖြစ်တာကြောင့် ငှက်တွေအတွက် စားလို့ စိတ်ချရတယ်လို့ ထင်နိုင်ပေမယ့် ထောပတ်သီးမှာ ပါဆင် (persin) လို့ခေါ်တဲ့ ဓာတ်တစ်မျိုးပါဝင်ပြီး အဲ့ဒီဓာတ်ဟာ ငှက်တွေအတွက် အဆိပ်ဖြစ်စေပါတယ်။ စားမိလို့ရှိရင် နှလုံးပျက်စီးတာ၊ အသက်ရှူလမ်းကြောင်း ပြဿနာတွေနဲ့ သေတဲ့အထိ ဖြစ်နိုင်ပါတယ်။ 

2. ချောကလက် - ခွေးတွေကြောင်တွေလိုပဲ ငှက်တွေလည်းပဲ ချောကလက်နဲ့ မတည့်ပါဘူး။ သီရိုဘရိုမိုင်း (theobromine) နဲ့ ကဖင်း (caffeine) ဓာတ်ပါတာကြောင့် အက်တစ်ဖြစ်လွန်းတာ၊ နှလုံးအရမ်းမြန်တာ နဲ့ လေဖြတ်တဲ့အထိ ဖြစ်နိုင်ပါတယ်။

3. ကဖင်း - ကော်ဖီ၊ လက်ဖက်ရည်၊ အချိုရည်တဲ့ စတဲ့ ကဖင်းပါတဲ့ အရည်တွေက နှလုံးခုန်နှုန်းကို မြင့်တက်စေတာ အက်တစ်အဖြစ်လွန်တာ မျိုးကနေ ရုတ်တရက် နှလုံးခုန်ရပ်တဲ့အထိ ဖြစ်နိုင်ပါတယ်။ ကော်ဖီ၊ လက်ဖက်ရည်တွေက အိမ်တိုင်းသောက်တတ်ကြတာမို့ ငှက်မွေးထားလို့ရှိရင် သူတို့နဲ့ ဝေးဝေးမှာသာ ထားသင့်ပါတယ်။

4.  အယ်လ်ကိုဟော - နည်းနည်းလေးသောက်မိရင်တောင် အများကြီးအဆိပ်ဖြစ်စေတာကတော့ အရက်ပါပဲ။ အရက်ကြောင့် ငှက်တွေရဲ့ အသည်းပျက်စီးနိုင်ပြီး အသက်ဆုံးရှုံးတဲ့အထိ အဆိပ်ဖြစ်စေနိုင်ပါတယ်။ ငှက်တွေက အရွယ်သေးတာကြောင့် အရက်နည်းနည်းဝင်သွားရင်တောင် ဦးနှောက်ပျက်တာ၊ အသည်းပျက်စီးတာနဲ့ အသက်ရှူလမ်းကြောင်း ပြဿနာတွေအထိ ဖြစ်တတ်ပါတယ်။

5. ကြက်သွန်အဖြူ၊ အနီ - ကြက်သွန်မှာ ငှက်တွေရဲ့ သွေးနီဆဲလ်တွေကို ပျက်စီးစေနိုင်တဲ့ ဓာတ်တွေပါဝင်ပါတယ်။ ဒါ့ကြောင့် အစိမ်းဖြစ်ဖြစ်၊ အကျက်ဖြစ်ဖြစ်၊ အမှုန့်ဖြစ်ဖြစ် နည်းနည်းပဲ စားမိရင်တောင် သွေးအားနည်းစေပြီး အန္တရာယ်ဖြစ်တတ်ပါတယ်။

6. ဆား - ဆားက ငှက်တွေကို ရေဓာတ်ခမ်းခြောက်စေပြီး ကျောက်ကပ် အလုပ်လုပ်မလုပ်တော့တာ ကနေ အာရုံကြော ပြဿနာတွေအထိ ဖြစ်နိုင်ပါတယ်။ ဒါ့ကြောင့် ဆားပါတဲ့ အစားအသောက်မျိုးတွေ ဥပမာ - အာလူးကြော် မကျွေးမိဖို့ ဂရုပြုသင့်ပါတယ်။

7. နို့ထွက်ပစ္စည်းတွေ - ငှက်တွေက နို့ထွက်ပစ္စည်းတွေမှာ ပါတဲ့ သကြားဓာတ် (လက်တို့စ်) ကို အစာခြေနိုင်စွမ်း မရှိပါဘူး။ ဒါ့ကြောင့် စားမိရင် ဗိုက်မကောင်းတာ၊ ဝမ်းလျှောဝမ်းပျက်ပြီး နေမကောင်းတာမျိုး ဖြစ်နိုင်ပါတယ်။

8. မှိုတစ်ချို့ - တည့်တဲ့မှိုလည်း ရှိသလို မတည့်တာတွေလည်း ရှိပါတယ်။ မတည့်တဲ့ တချို့မှိုတွေမှာ ငှက်တွေကို အစာအိမ်ပြဿနာနဲ့ အသည်းပျက်စီးစေနိုင်တဲ့ ဓာတ်တွေပါဝင်တာမို့ ဘယ်မှိုမှ မကျွေးတာတော့ စိတ်အချရဆုံးပါ။

9. ခရမ်းချဥ်အရွက်နဲ့ ရိုးတံ - ခရမ်းချဥ်သီး အမှည့်နဲ့တော့ တည့်ပေမယ့် အရွက်၊ ရိုးတံနဲ့ ခရမ်းချဥ်သီး အစိမ်းတွေမှာ ဆိုလာနိုင်း (solanine) ဓာတ်ပါဝင်တဲ့အတွက် အစာအိမ်မကောင်းတာနဲ့ နှလုံး ပြဿနာတွေ ဖြစ်စေနိုင်ပါတယ်။

10. ဇိုင်လီတောလ် - လူလုပ်ထားတဲ့ သကြားဓာတ် (xylitol) ကို ပီကေ၊ သကြားလုံးနဲ့ ကိတ်၊ ပေါင်မုန့်တွေမှာ တွေ့ရတတ်ပါတယ်။ ဒီဓာတ်ဟာ ငှက်တွေမှာ သွေးတွင်းသကြားဓာတ်ကို လျော့ကျစေပြီး အသည်းပျက်စီးတာမျိုး ဖြစ်စေနိုင်ပါတယ်။